كثير عبالي اكتب عن اشياء ومش عارفه من وين ابلش ومن وين اطنش,اكتب عن الحب يلي مش جاي وشكلو ما بدو يجي؟ ولا عن الوطن يلي فينا ومش علينا؟ ولا عن فلسطين يلي عم بستعملوها لاستطلاعات الرأي في الوسط العربي ومع سؤال الموسم:هل قضية فلسطين هي القضيه المركزيه للعرب؟ ويختتمون الاجابه بلا اجابه مع العاهرات صاحبات الجلاله والكُرسي المتنقل, رئيسات القممات العربيه,مش هاين علي انو اناديكو بالعاهرات لانو العاهرات اشرف منكو,على القليله بتحكمو بس بجسدهن مش بجسد الامه.
منرجع لموضوعنا...
ولا اكتب عن الشب يلي بحلم فيه,صاحب الظل المتوسط والعيون السوداء والبشره السمراء والشعر المهمل والاظافر القصيره(للنظافه,زي ما بتعرفو كل الوسخ بعلق بالاظافر الطويله) ولا الالي يلي بحب يكون يعزف عليها ..ممكن تكون جيتاره او عود واذا كان ساكسفون بكون ممتاز واذا كان اورج فَ بفضل يعتزل العزف او ناي او درامز(لاشعال ثورة الجنون) بما انو اجت كلمة جنون..مننتقل لجنون ..بحبش لجنون العربي لانو جنون غبي وتقليدي ومحدود وجنون تياسي صح انا بحب التياسه وتياسة لجنون تحديداَ بس مش تياسة الجنون العربيه,وانا مش متأثره بالحضاره الامريكيه ولا بحريتهم ولا بأتيكيتهم ولا في اشي منهم,وعشان هيك كمان ما بحب لجنون الغربي لانو جنون متصنع,ولجنون اليهودي؟...كس امو بفضل احكي عن جنون الخنازير ولا احكي عن هالشعب المقرف,المهم..بحب هالشب يكون مكنفش وما بهتم بالمناظر واذا معو شيقل بعيش واذا معوش بعيش(بس مش على حسابي) ويكون موسيقي او على القليله سميع ومذوق,ويقدرني انا(مش بالضروره المرأه بشكل عام..مش كثير بتهمني) ويكون رجل(مش المقصود 1000 سوس) رجل..بمعنى كلمة رجل ومن تعول الشرف ولكن الشرف بمعنى الشرف ومش الشرف المربوط بغشاء بكارة اختو او بنت عمو.. او بنت بلدو(على اساس)..وقلبو طيب وانسان وعندو فكر وصاحب موقف وعندو مبدأ وطرح خاص فيه وبعيد عن الدين وقريب من الله(حزب بحالو) ..حاسه حالي بلشت اخبص,وبديش اكمل بالوصف الجنوني المتهور الذي لا مكان له من الاعراب,خلي عنصر التشويق عندكو.
ولا اكتبلكو عن حياتي المبعثره ولا عن جنوني ولا مزاجياتي ولا غروري ولا الانا تعيتي ولا عن الخجل الناقص ولا عن الله ولا عن تأثيري في الفيسبوك بأخر فتره ولا على انو مش عم بعمل اشي بحياتي في اخر فتره, ولا على المعارف الزايده بكثافه متهوره في هالفتره لدرجة صرت انادي على محمد احمد ومحمود حمودي وحمودي حماده يلا مهي كلها اسامي تابعه للنبي بالاخير, ولا انو عم بهمل حالي كثير..يلا هاد موضوع حلو والصبايا رح يحبو على القليله اذا محبهوش بكون اعطيتهن مجال يشمتو فيه..
هاد انا يا سيدي من الاناث لمطنشات حالهن,لا بحط منكير ولا حاطه في ذاني 30 حلقه ولا حتى حلقه وحده ولا بلبس اسواره ناعمه ولا خلخال في اجري مع انو للتدقيق مره البست بس كان خيط ذكوري لا يدل على الانوثه,وما بستعمل مسيخوت للوجه ولا كثير بهمني مظهري الخارجي,ومشهوره ببلايزي لوساع ورسومات الولاديه على هالبلايز,ومشهوره ببنطلوني لترينج الاسود وبوتي ابو لكفتسيم واذا بكون في عرس بتغلب تنو اعرف البس تنوره واتمكيج(بعد عناء طويل) واستغنى عن نظاراتي النظر بتبديلهن في عدسات مزعجه بتسببلي لدموع وهيك بخرب المكياج وبتعكر مزاجي وكنك يا ابو زيد ما غزيت,وبالاخير بحكولي لازم تزبطي, انت انثى !!. انو يعني مش فاهمه انوثتي بس لما البس شيال وشرط قصير واحط احمر واخضر واطلع زي رسمة مونليزا مش معروف شو لوني؟؟ انا انثى..بكل الحالات,مع بطلون وسيع ومع شرط قصير !
...
موضوع ممل..
...
وشو مع الاذان؟؟ لي بأذن 5 مرات في اليوم ممكن افهم؟؟ لي كل ما اجي اسمع موسيقى بتذكر يأذن؟ ولي بس اجي اغفى الظهر او الصبح بصير يأذن؟ كل شي ولا اذان الصبح... يا جماعه انا مش ضد الاذان بس كثير صوتو عالي وانا صغيره كنت كل يوم زي فرض الصلاه اقوم اعيط من صوت اذان الصبح كنت ارتعب,عنجد كثير الاشي بخوف,الواحد نايم ومكيف وابصر بشو بحلم وبطلعلك مره وحده "الله اكبر..والصلاة خيراَ من النوم" ليش يعني انت خليت فيها نوم؟؟ انو ايش بصير اذا ببعثو مسجات على التلفون للمصلين فقط بوقت الصلاه وخلص؟؟
ولا ايش مع انفلونزا الخنازير؟ وشو مع انو نرجع نوكل خنازير..
وشو مع الكوله وينتا بدنا نقاطعها ونعمل كوله فلسطينيه خاليه من الكحول؟
وشو مع انو اذا حررنا فلسطين وحماس مسكة السلطه واصبحنا دوله اسلاميه شو مع البارات ؟؟ بدهنش يفتحولنا بار او بوب على القليله؟ حرام هيك..بنفعش! وين بدهن يسهرو الشبيبه الشيوعيه الاسرائيليه؟ ويك اه وشو مع تعريفهن "الاسرائيليه" بضل بعد التحرير ولا بتحول "الفلسطينيه" سؤال محيرني.
هل يا ترى اذا حررنا فلسطين الحلاقين بضلهن يسكرو يوم الاثنين؟
وهل سيحتفطون في محل الدنك الاثري الذي يقع في شارع بنغريون في حيفا؟
واذا حررناها بضل البنك يوخذ عملاه؟
بضل تأمين الختايره؟
واذا حررناها... على شو بدنا نظاهر؟ ولا على شو بدنا نحتج؟ وشو مع النكبه؟
اذا استقلت ممكن انهن يغيرو الوان العلم الفلسطيني؟ ولا يغيروا النشيد الوطني؟
ولو ولو ولو شو صبابا لما نحررها..بدنا نكسر الرمزورات ونطخ مليون باغه !! ولا لأ منخبي لرصاص للاحتلال القادم.
...
سنقيم فيستيبال بيره اخو فلاتي في القدس ونشرب كاس التحرير ونجيب يزن الروسان يغني للشعب المسكين "انا وياك احلى 2..انا وياك احلى 3...زيح طعوجت الانتين,يا حبيبي...انت اخو فلاتي..ويا محلا الموت لاجلك فلسطينَ"
وين بتحبو نعمل الفيستيبال؟؟ ناطر اقترحاتكم.
אין תגובות:
הוסף רשומת תגובה